נא - א למנצח מזמור לדוד - ב בבוא אליו נתן הנביא כאשר בא אל בת שבע - ג חנני אלהים כחסדך כרב רחמיך מחה פשעי - ד הרבה הרב כבסני מעוני ומחטאתי טהרני - ה כי פשעי אני אדע וחטאתי נגדי תמיד - ו לך לבדך חטאתי והרע בעיניך עשיתי למען תצדק בדברך תזכה בשפטך - ז הן בעוון חוללתי ובחטא יחמתני אמי - ח הן אמת חפצת בטחות ובסתם חכמה תודיעני - ט תחטאני באזוב ואטהר תכבסני ומשלג אלבין - י תשמיעני ששון ושמחה תגלנה עצמות דכית - יא הסתר פניך מחטאי וכל עונתי מחה - יב לב טהור ברא לי אלהים ורוח נכון חדש בקרבי - יג אל תשליכני מלפניך ורוח קדשך אל תקח ממני - יד השיבה לי ששון ישעך ורוח נדיבה תסמכני - טו אלמדה פשעים דרכיך וחטאים אליך ישובו - טז הצילני מדמים אלהים אלהי תשועתי תרנן לשוני צדקתך - יז אדני שפתי תפתח ופי יגיד תהלתך - יח כי לא תחפץ זבח ואתנה עולה לא תרצה - יט זבחי אלהים רוח נשברה לב נשבר ונדכה אלהים לא תבזה- כ היטיבה ברצונך את ציון תבנה חומות ירושלם - כא אז תחפץ זבחי צדק עולה וכליל אז יעלו על מזבחך פרים -
Les fetes juives - les tehilims - les psaumes - explications - cours - videos - musiques - films